No marco do Plan Estratéxico da Política Agraria Común (PEPAC) 2023-2027, e cofinanciado
parcialmente polo Fondo Europeo Agrícola de Desenvolvemento Rural (FEADER), a Consellería
do Medio Rural e o Concello de O Irixo asinaron un convenio de colaboración para desenvolver
accións de prevención e defensa contra os incendios forestais durante os anos 2025 e 2026. O
obxectivo principal deste acordo foi mellorar a eficacia na loita contra os lumes mediante a
coordinación institucional e o aproveitamento óptimo dos recursos dispoñibles.
No desenvolvemento deste convenio, estase a levar a cabo unha operación centrada en dúas
liñas principais de actuación: por unha banda, as tarefas de vixilancia e defensa fronte aos
incendios forestais; e por outra, os traballos de prevención mediante a xestión da biomasa en
áreas de risco. Para iso, púxose en funcionamento unha brigada composta por cinco persoas,
que permanece operativa durante un período de tres meses, comprendido entre o 7 de agosto
e o 6 de novembro. Esta unidade integrouse dende o primeiro momento no dispositivo de
emerxencias do Distrito Forestal do Carballiño, colaborando de forma activa nas tarefas de
detección, defensa e extinción de incendios.
Ao mesmo tempo, estanse executando labores manuais de prevención que inclúen traballos de
roza e a inspección do estado das parcelas pertencentes ás redes de faixas secundarias de xestión
da biomasa forestal. Estas actuacións complétanse coa elaboración dos correspondentes
informes de xestión, conforme ao disposto na Lei 3/2007, do 9 de abril, de prevención e defensa
contra os incendios forestais de Galicia.
Cómpre sinalar que o persoal participante foi previamente sometido a recoñecementos médicos
e a probas físicas de esforzo, co fin de garantir a súa aptitude para o desempeño das tarefas
asignadas. A documentación acreditativa destas avaliacións foi remitida ao persoal técnico do
distrito forestal antes do inicio da actividade operativa, garantindo así o cumprimento dos
requisitos establecidos.
Como resultado desta intervención, estase a reforzar a capacidade de resposta do Concello de O
Irixo fronte aos incendios forestais, reducindo a acumulación de combustible vexetal nas zonas
de maior risco e avanzando no cumprimento da normativa autonómica en materia de
prevención. Ademais, consolídase un modelo de colaboración eficaz entre a administración
autonómica e a local, contribuíndo á protección e sostibilidade do medio rural galego.
